آشمن فرقة الكورة نشجع في أمريكا اللاتينية ؟

ملعب الأحباس - هدى شعلون

هادي واحد الشهر تقريبا طاحت ليا هاد الفكرة في راسي. علاش؟ لان كرة القدم في اغلب دول العالم أسهل موضوع يمكن تجبد بيه الهضرة مع شي واحد مكتعرفوش. 

تخيل معايا دابا انت مشجع ديال الرجاء (العالمي، طبعا!) وواقف في المحطة كتسنا التران من كازا فواياجور غادي للرباط، و جات واحد الدرية…لا لا بلاتي هادي ساهلة…وجا واحد الولد متقل بصاك وباينة عليه على باب الله وخى زعر و عينيه زرقين (دابا تخيل معايا كون كملت بالدرية فين كنا غنوصلو)، الموهم صاحبنا جا وقف حداك و حاول يجبد معاك الهضرة…

الزعر:”واتيز يور فيفوريت كازابلانكا تيم، رجا اور وداد؟”

آشنو غادي تدير في هاد الحالة؟ غالبا ماغاديش تدور وجهك وتدير بحالا ماسمعتي والو، القليلة غاتگول في راسك “الرجا عالمي نورمال يعرفوه الزوعر، والوداد لاش؟ بلاتي نصححو المعلومات لهاد خينا!”

بين قوسين وباش ما يتهرس والو في هاد الموقع: في حالة كنتي ودادي غتگول في راسك “الراجا واخا فرقو عليهم البقعات الارضية، الزوعر كيعرفو الوداد بحال الرجا. كيتكم اراجاوا!” ( السلامة يا ربي السلامة)

في جميع الأحوال غادي تلصق على وجهك ابتسامة (واخا ماكامي، ماشارب قهوة و التران معطل ساعتين)، وغاتدور عند صاحبنا و تجاوبو.

 الرجا ولا الوداد غيجبدو حوايج أخرى “منين نتا”، “فين غادي؟”، “لاش جيتي؟”  “دونت گو تو تقدم، دنجروس…”

الكرة أيضاً أحسن طريقة باش تثير انتباه و فضول الآخرين و خصوصا الأطفال. تفكرت واحد الصديق أرجنتيني  مصور محترف ملي كنا كندورو في حي الحبوس. كان لابس التوني ديال لارجنتين وهما يتجمعو عليه الدراري الصغار وها الي عيط ميسي وها لي يغوت مارادونا. المهم السيد شبع معاهم تصاور و ضحك وحتى انا دزت في وجهو وخديت هاد الصورة للدراري وهما لاعبين ماتش.

الكرة في الحبوس - هدى شعلون
الكرة في الحبوس – هدى شعلون

هانتوما فهمتو علاش بغيت نبدا نتعرف على فرق الكرة في أمريكا اللاتينية و خاصة أنهم كيتصطاو على الكرة و مهبلاهم بحالنا.

دابا خاصني جوج ديال الحوايج : شوية ديال الثقافة العامة على فرق البلدان لي غنزور و التوني، ديال فرقة مشهورة عالميا، لي غنلبس مرة مرة ملي نوصل شي بلاصة جديدة.

التوني حالو قريب و مغنقلبش بزاف! أوف كورس غاندي ندي توني ديال الدفاع الحسني الجديدي الحائز على كأس العرش و بطل الخريف فشي عام.

في الحقيقة انا فخورة بزاف بمدينتي و بفريقنا، و اكبرت وانا عاقلة على الوالد ملي كان كيديني على كتافو لتيران العبدي. من هاد الشي كلو تسناو تشوفوني لابسة التوني ديال الدفاع في “أدغال أمريكا” ؛)

دابا الفرق…انا فين ما كنتلف ماكنشدش لارض ولكن كنسول صحابي في تويتر، حيت تبارك الله عليهم ماخلاو حتى حاجة مافهموش فيها.

صحابي ديال تويتر دغيا دارو ليا الليستة ديال الفراقي لي خاصني نشجع في كل بلاد:

– أمريكا كالي في كولومبيا

– ليگا اونيفرسيتاريا كيتو في الإكوادور

– أليانزا ليما في البيرو

– بوليفار في بوليڤيا

– بوكا جونيورز في الأرجنتين

وأخيرا وليس آخرا…

– ديبورتيڤو بالستينو في الشيلي.

(Deportivo Palestino) توني ديبورتيڤو بالستينو
(Deportivo Palestino) توني ديبورتيڤو بالستينو

و المهم إلا خاصكم شي توني ديال هاد الفريق ماتحشموش، دوزو الطلب في تعليق و نصيفطو  ليكم من هنا لآخر العام. الثمن؟ ماغنزيدش عليكم بزاف ؛)

 بي ايس: وا الدفاع زطوروطو…

More from Houda Chaloun

Granada…vite!

Deux nuits à Granada mais moins que 48 heures. C’est que la...
Read More

1 Comment

  • oua totote oua tiri
    li zwine bezzaf f had touni kado houa le rouje et le vert
    tamanou cher ou kimtou kbira .lmouhim kbel ma temchi lchinoua douzi nchoufouk aw tassli ;nwassiwk bchi baraka parceque chinwa kawm fchichkel ;choufi bnou batot fi sine dakh mafhem oulou ou ja qui awd chi hwaij chafhoum houa lwahdou ma chafouha chinoua . l’opium machi bhal lkif ou zaydoun chinoua ma andhoumch lehmar ma ki arfouhch ou mni kichoufouh fi tv ki tmennaw y yakloh .
    tssawri chhl y mken lehmar y xekkel fi chinoua li ki yaklou jrbbaniya dial roz fi nhar ?
    ch’hal yallah?
    MATKADRICH TA4ARFI OU IL A BGHITI TAARFI GOULI LINA TAMAN DIAL TOUNI §
    SALAM

Leave a Reply

Your email address will not be published. Required fields are marked *